Sábado, 03 de Mayo de 2008 - 21:46
B. Medio Rural 25/4/2008
SANTIAGO. AGN.- A Asociación de Sumilleres de Galicia presentou en Santiago os galardoados cos premios 'Distinguidos Gallaecia 2008' no apartado de augardentes e licores tradicionais da comunidade autónoma.
Na cata participaron 23 empresas, entre adegas e destilerías, cun total de 55 destilados presentados. Interviñeron 18 catadores, entre os que se atopaban o sumiller de Martín Berasategui, Steven Label; o do Café de París, de Madrid, Christian Postigo; o do Restaurante Rodrigo de la Calle, de Aranjuez, Jacobo Angiano; e o do Restaurante Mugaritz, de Rentería (Guipúzcoa), Aurelio Molina.
Á presentación dos seleccionados acudiron o presidente de Gallaecia, Xurxo Rivas, o director das catas das Distincións Gallaecia, Luís Paadín, e o presidente do Consello Regulador da Denominación de Orixe Augardentes e Licores Tradicionais de Galicia, Evaristo Rodríguez López, así como o vocal de Gallaecia pola provincia da Coruña, Javier Míguez. Na edición deste ano, a novena, a cualificación en calidade resultou un punto superior á conseguida na anteriores convocatorias.
Distincións
No apartado de augardentes brancos foron sete destilados os distinguidos: Caña de Baladiña (Adegas Lagar de Besada), Fillaboa (Adegas Fillaboa), Lauro de Nobleza (Adegas Campante), Mosteiro de Xagoaza (Adegas Godeval), Pazo Casanova (Adegas Pazo Casanova), Quinta Couselo (Adegas Quinta de Couselo) e Ximonde Albariño (Aguardientes de Galicia).
En augardentes envellecidas optouse por marcar as Abadía da Coba envellecido (Adegas Moure) e Fefiñanes envellecido (Adegas Palacio de Fefiñanes), mentres que en augardentes de herbas distinguiuse, exclusivamente, a Pazo Valdoviño augardente de herbas (Destilería Pazo Valdoviño).
Os licores de herbas galardoados foron Lúa licor de hergas (Coopertiva Vitivinícola do Ribeiro), Martín Codax licor de herbas (Adegas Martín Códax, Mosteiro de Xagoaza licor de herbas (Adegas Godeval) e Pazo Valdomiño licor de herbas (Destilería Pazo Valdoviño).
Para rematar, acordouse distinguir tres marcas de licor café, en concreto Terras Celtas licor café (Destilería Pazo de Valdomiño), Terras de Lantaño licor café (Adegas Viña Cartín) e Torroxal licor café (Adegas e Viñedos Torroxal). A Asociación de Sumilleres Gallaecia está formada por 125 profesionais e leva nove anos celebrando estas distincións.
cm